Tad Medar

Jacques Marie Dourmap, Tad Medar e anv lean, ganet d'ar 7 a viz Here 1908 e Lannarvili, e-kreiz Bro-Leon ha marvet e Plerin d'an 3 a viz Mae 1988, a oa ur manac'h kabusin a zo bet ur skrivagner brezhonek ivez.

E vuhez

Goude e studioù e Lesneven hag e kloerdi Kemper ez eas da vanac'h. Meur a vloaz a dremenas e kouent Rosko. Pa oa eno e voe e penn Ar Vuhez Kristen, ur gelaouenn vrezhonek a badas betek dibenn an Eil brezel-bed. D'ar mare-se ivez e skrivas an Tad Medar levrioù evel Fatima, Ar Werc'hez Vari pe Diwar C'hoarzin. Er bloavezhioù 1960-1970 edo o chom en ur gouent e Gwengamp.
E dibenn e vuhez, pa oa e korn-bro Sant-Brieg e savas daou levr all c'hoazh, An Tri Aotrou ha Paotred an Ognon. Mervel a reas e Plerin d'an 3 a viz Mae 1988.

Red e vuhez

7 a viz Here 1908, ganet e Lanarvili.
29 a viz Gwengolo 1931. Lean er Mans.
26 a viz Mae 1934. Gouestladur belegïezh.
1934. Kregiñ a ra da brezegenniñ er misionoù parrez, retredoù ha pardonioù.
Eus miz Mezheven da viz Gwengolo 1940. Person Loprevaler (asambles gant novised yaouank).
Miz Meurzh 1946. Diazezadur kouant ar Gapusined e Gwengamp.
1948. Sekretour Kreizenn Bastorel ar Misionoù Diabarzh (CPMI). Misionoù e Breizh.
7 a viz Du 1958.Kenrener ar Greizenn (CPMI) gant an tad J-F Motte, an diazezour.
Eus 1962 da 1965. Sekretour an aotrou Person e Koñsil pe Sened-Iliz Vatikan II.
1966-1970. Beajoù displegañ ar Sened-Iliz e Kanada.
1971-1978. Aluzenner Kelenndi an Itron-Varïa e Gwengamp.
1978-1988. Aluzenner Oaled Breuriezh Katolik ar re glañv e karter Sant-Laorañs e Plerin.
3 a viz Mae 1988. Marv an Tad Medar.

Oberennoù

Ar Werc'hez Vari hor Mamm, Ti-moulañ Bokle, Montroulez, 1937, in-8, 130 p.
Fatima, Ar Vuhez Kristen, Rosko, 1943
Sant Fransez a Asiz, mignon ar vugale, Ar Vuhez Kristen, 1942
Kentelioù Santez Elizabed a Hongri (1207-1231),Ar Vuhez Kristen, Rosko, 1944.
Diwar c'hoarzin, Ar Vuhez Kristen, Rosko, 1945, skeudennaouet gant Langleiz.
An Aviel hervez sant Mazhe, troet gant an Tad Medard, kabusin, ha Maodez Glanndour, Studi hag Ober, 1952, rummad "Ar Bibl Santel", moullet e Les Presses bretonnes e Sant Brieg, 96 p.
An Tri Aotrou, 1981.
Paotred an Onion, Emgleo Breiz, 1986
Istorioù beleien, Al Liamm, 1990.

Kenlabour

Gwelout Geriadur ar Skrivagnerien ha Yezhourien, Lukian Raoul, Al Liamm, p. 90-91

Diwar e benn

Père Médard, redites-nous encore, association "Les Amis du Père Médard", 1996.