Ondina (boudig)

Ondina zo anv ur voudig a vev er feunteunioù, ar stêrioù hag al lennoù ; a wechoù e vez taolennet evel ur vorganez er mor pe ur c'hrouadur ijinet gant ur barzh. Niksenn a vez graet anezhi ivez er mojennoù pobl alamanek hag e re Lec'hlenn.

Ondine, gant John William Waterhouse (1872)

Die Nymphe des Rheins, L. M. von Schwanthaler (1855)

Lorelei ar stêr Roen eo an hini vrudetañ.

Un doare nimfenn pe naiadenn zo anezhi. N'eo ket en dourioù sall e vev, en dourioù dous eo. N'eo ket ul lost-pesk he deus, met blev melen ha kriboù aour pe olifant. En hañv e plij dezhi bezañ en he c'hoazez war bardell ar feunteunioù ha kribañ he blev hir. Kouronkañ el lammoù-dour, er stankoù, er stêrioù a blij dezhi pa vez tomm. Hag ar re a vez o blev a-liv gant an aour o devez teñzorioù bras a viront en o c'hastelloù dindan an dour.

Dont a ra dour ar feunteunioù eus daeroù an ondinaed, ha mont a reont da hesk pa vez broc'het unan anezhe. Se zo kaoz e vez lezet profoù a bep seurt e-tal ar feunteunioù, evel garlantezioù a vleunioù, spilhoù pe tammoù gwer torret a zo gwir deñzorioù a lintr hag a sked en dour.

Yezhoù arall

• Undine eo en alamaneg hag e saozneg.
• Ondine eo e galleg ; ur stumm gourel ondin zo ivez.

Lennegezh

E meur a oberenn lennegel ez eus ondined.

• Ondinenn, danevell gant ar skrivagner alaman Friedrich de la Motte Fouqué e 1811, troet gant Maopreden ha Roparz Hemon diwar Undine, Arvor, 1943.
• Den lille Havfrue, kontadenn gant Andersen e 180037.
• Ondine, barzhoneg c'hallek diwar zorn ar barzh gall Aloysius Bertrand en e zastumad Gaspar de la nuit e 1842.
• A Ondina do Lago, barzhoneg portugalek gant Teófilo Braga e 1866.
• Ondine, pezh-c'hoari ar skivagner gall Jean Giraudoux e 1939.
• Undine, barzhoneg gant ar barzh iwerzhonat Seamus Heaney e 1969.
• Barzhonegoù a bep seurt gant Luis de Camões (~1524 – ~1579-80) ha Pierre de Ronsard (1524-1585) da skouer.

Sonerezh

• Undine, c'hoarigan gant E.T.A. Hoffmann, levrig gant F. de la Motte Fouqué, e 1814.
• Undine, sonatenn evit ur fleüt hag ur piano gant Carl Reinecke e 1885.
• Vodnik, barzhoneg sinfoniek gant Antonín Dvořák (B. 195 opus 107) e 1896.
• Rusalka, c'hoarigan gant Antonín Dvořák (B. 203 opus 114) e 1901.
• Ondine, rann gentañ ur pezh sonerezh evit ar piano skrivet gant Maurice Ravel, anvet Gaspard de la Nuit diwar barzhoneg Aloysius Bertrand, e 1908.

Pennadoù kar

• Rusalka

Levrlennadur

• Brasey, Édouard. Sirènes et Ondines. Paris : Éditions Pygmalion, 1999 (ISBN 978-2-85704-608-0)