Welrod
Ar Welrod zo ur bistolenn savet er Rouantelezh-Unanet da vare an Eil Brezel-bed. Soñjet e oa bet gant servijoù diorren dafar an SOE evit servijout en oberadennoù kuzh el lodenn eus Europa aloubet gant an Trede Reich. Kregiñ a reas he froduiñ e 1943 (stumm Mark II e .32 ACP), ha adalek 1944 e voe savet ar stumm Mark I e 9 mm Parabellum. War-dro 15.000 skouerenn anezhi a voe produet[1], ha lod anezhe a voe harzlammet da emsavoù rezistañs e fin ar brezel, e Danmark dreist-holl. Implijet e voe gant ar Rouantelezh-Unanet betek deroù ar bloavezhioù 1990, en oberadenn Desert Storm a-enep Irak[2].
| Welrod | |
|---|---|
.jpg) Ur bistolenn Welrod Mk I (9 mm Parabellum) | |
| Kinnig | |
| Bro | .svg){kind=small} Rouantelezh-Unanet
|
| Doare | Pistolenn |
| Mont en-dro | Tennata dre vorailh |
| Munisionoù | .32 ACP (stumm Mk II) 9 mm Parabellum (stumm Mk I) |
| Produer | BSA |
| Mare produiñ | 1943 - 1944 |
| Mare implij | 1944 - war-dro 1991 |
| Pouez ha muzulioù (stumm Mk II) | |
| Mas (hep kartouchenn) | 1,080 kg |
| Hirder | 310 mm |
| Hirder ar c'hanol | 105 mm |
| Perzhioù all | |
| Hed-tenn pleustrek | 20 / 25 m |
| Endalc'h | Karger-fiñv 6 kartouchenn (stumm 9 mm Parabellum) Karger-fiñv 8 kartouchenn (stumm .32 ACP) |
| Stummoù | Mark II (1943) Mark I (1944) |
| Lezenn | |
| Rummad e Bro-C'hall | B |
Dont a ra hec'h anv eus lizherennoù kentañ kêr Welwyn (Hertforshire), e-lec'h ma oa ar Station IX, unan eus labourvaoù diorren an SOE, ha deus ar ger rod a dalvez "garenn" pe "barrenn" e saozneg[1]. Ar marc'h-tan Welbike hag al lestr-spluj Welman zo bet anvet diwar ar memes doare.
Deskrivadur
kemmañ.jpg)
Platinenn ar Welrod zo un-ober. Puñs he c'harger zo berr-kenañ, pa baouez er memes live hag ar pontig : ur wech tennet ar c'harger eo aesoc'h an arm da guzhat. Etre pep tenn e ranker adkambriñ ur munision en ur dreiñ ar gulasenn eus ur c'hard tro a-raok sachañ warni. Unan eus perzhioù talvoudusañ ar Welrod eo he reduer-son. Evit izelaat c'hoazh tizh mont er-maez ar boledoù, hag o zrouz neuze, ez eus 16 toull tro-dro d'ar c'hanol[3]. Evit gellet implijout an draen e ranker pouezañ dre ret war ul loc'henn a-dreñv d'an dornikell-karger, da lavaret eo derc'hel an arm da vat, kement-mañ evit gwellaat surentez an arm[1].
Damheñvel eo mont en-dro an daou stumm produet war-bouez o endalc'h (8 kartouchenn e .32 ACP, 6 kartouchenn e 9 mm). N'eus pontig ebet war ar stumm Mark II, hag enbarzhet eo e reduer-son. War ar stumm Mark I eo distag hag e rank bezañ biñset war ar c'hanol a-raok an implij : kement-se a aesa c'hoazh ar c'huzhat[2].
