Paotr Treoure

Paotr Treoure a oa anv-pluenn Augustin Konk, beleg a Vro-Leon, brudet ivez evel An aotrou Konk.

Anv-pluenn

Dindan meur a stumm e kaver e anv-pluenn : Paotr Treoure^[1], Paotr-Tréouré^[2], Potr Treoure^[3]… Hervez katalog Levraoueg broadel Bro-C'hall ez eo Paotr Treoure ar stumm etrebroadel^[4].

E vuhez

D'ar 16 a viz Here 1874 e voe ganet Augustin Konk e Treoure, e parrez Plougin. E skolaj Lesneven e reas e studi kent bezañ beleget e 1898. Kure e voe e Kastell-Paol, person e Lokenole goude-se ; e 1930 e voe person e Plouneour-Traezh, ma chomas betek e varv d'ar 26 a viz Kerzu 1952 e Kastell-Paol.

Er skolioù katolik e veze lakaet ar vugale da zeskiñ e vojennoù dre an eñvor, evel ma veze desket Fablennoù Jean de la Fontaine e galleg.

E 2021 ez eus bet embannet ur bladenn gant TES, enni darn eus e vojennoù, asambles gant re all, troet e brezhoneg diwar fablennoù La Fontaine gant meur a aozer ha lennet gant meur a vouezh (Mari Kermareg, Loeiza Beauvir, David ar Gall...)^[5].

Oberennoù

Barzaz ha Soniou evit ar vugale (Presse Libérale, Brest, 1935, nemet bloavezh ebet merket war al levrig) gant barzhonegoù ha kanaouennoù. Adembannet div wech :
- Mojennou ha Soniou (Imprimerie Centrale de Bretagne, Rennes, hep bloavezh), adembannadur kresket eus al levr kentañ, graet war-lerc'h an Eil Brezel-bed, ennañ ur rakskrid gant ar chaloni Frañsez Falc'hun. Darn eus ar skridoù a voe implijet gant Radio-Kimerc'h.
- Mojennou, Brud Nevez, 1982.

Kanaouennoù

Un toullad kanaouennoù zo bet savet gantañ^[6], war tonioù eus Bro-Skos, Kembre, Kernev-Veur, SUA ; re all kempennet hepken. En o zouez :

Gwir Vretoned, war ton Seziz Gwengamp, e Barzhaz Breizh, bet brudet bras ;
Marijanig Lagadbran, dastumet ha kempennet gantañ (hep ma oufed resis diwar beseurt danvez), kanet en ur bern skolioù Diwan ;
Mari Vastrouilh, savet gantañ war un ton eus SUA ;
Va zi bihan, diwar ur ganaouenn eus Kembre, bet enrollet gant Eliane Pronost ;
Luskell va bag, diwar ur c'han a Vro-Skos, The Skye boat song ;
Good onions, very cheap, diwar-benn ar Jonied ;
Ar bloaz nevez, diwar un ton eus Kembre ;
Yannig an difouper neiziou, war don gavotenn an Aven (ha hini ar ganaouenn Matilin an Dall), savet pe gempennet.

Levrlennadur

Abeozen : Istor lennegezh vrezhonek an amzer vremañ (Al Liamm).

Pennadoù kar

Liammoù diavaez

Oberennoù Paotr Treoure er CRBC Brest

Notennoù

↑ Kroaz Breiz, niv. 20, 1949 (taolenn p. 1, fin ar pennad p. 9).
↑ Barzaz ha Soniou evit ar vugale.
↑ Mojennou ha soniou. Ha Paotr Treoure er rakskrid, koulskdoude, diwar pluenn Frañsez Falc'hun.
↑ Pajenn Paotr Treoure.
↑ Fablennoù La Fontaine.
↑ Ur roll anezho a gaver amañ.

[1] Kroaz Breiz, niv. 20, 1949 (taolenn p. 1, fin ar pennad p. 9).

[2] Barzaz ha Soniou evit ar vugale.

[3] Mojennou ha soniou. Ha Paotr Treoure er rakskrid, koulskdoude, diwar pluenn Frañsez Falc'hun.

[4] Pajenn Paotr Treoure.

[5] Fablennoù La Fontaine.

[6] Ur roll anezho a gaver amañ.

[1]

[2]

[3]

[4]

[5]

[6]