Brezhoweb
| Brezhoweb | |
|---|---|
| |
| Chadenn skinwel | |
| Krouet | miz Kerzu 2006 |
| Perc'henn | LB Krouiñ |
| Yezh | brezhoneg |
| Bro orin |  Breizh
|
| Statud | Chadenn brevez |
| Chadennoù c'hoar | Òc Tele, Galoweb |
| Lec'hienn | www.brezhoweb.bzh |
| Skignañ | |
| Web | Ya 
|
| Takad skignañ | Breizh
|
Brezhoweb a zo ur chadenn skinwel e brezhoneg war ar genrouedad, krouet e miz Kerzu 2006 gant ar c'helaouenner breizhat Lionel Buannic, bet kazetenner e France 3 ha pennredaktour ar chadenn skinwel TV Breizh, evit krouiñ ha skignañ abadennoù e brezhoneg.
Ur chadenn brevez digoust eo, perc'hennet gant an embregerezh Lionel Buannic produiñ. Aotreet eo ar chadenn abaoe 2010 gant ar CSA (deuet da vezañ an ARCOM abaoe ar 1añ a viz Genver 2022).
Meur a briz o deus resevet. Kenlabourat a ra Brezhoweb gant ar chadennoù Òc Tele ha Kanaldude, en ur eskemm programmoù[1],[2] hag en ur genbroduiñ reportajoù a-wechoù[3].
Istor
kemmañKrouet eo bet al lec'hienn internet brezhoweb.com e miz Kerzu 2006. Er penn-kentañ e veze skignet un abadenn Webnoz bep miz. A-drugarez d'ar berzh en deus graet ar raktres kent ez eo bet diorroet ar c'hinnigoù. Goude bloaz ez eus bet kroget da skignañ tresadennoù-bev, bet advouezhiet e brezhoneg gant Dizale, ouzhpenn an abadenn viziek. Ken Tuch' eo ar sitcom kentañ produet ganto, e miz Meurzh 2008 e oa bet kroget ganti. E miz Gwengolo 2009 eo bet adframmet al lec'hienn en un doare modernoc'h. Ur sitcom nevez a zo ivez, Saga Brittia e anv, hag un abadenn nevez evit ar vugale, Dibikouz. En holl e vez skignet ouzhpenn 70 eurvezh a abadennoù e brezhoneg ar bloaz gant Brezhoweb. Teir gwech ar bloaz e vez skignet filmoù hir bet advouezhiet e brezhoneg gant Dizale.
E 2009 ez eus bet skignet un nebeud rannoù eus Ken Tuch' war Canal+ en abadenn Les Films Faits A La Maison.
Aozadur
kemmañSkoazelloù arc'hant a vez resevet gant Brezhoweb a-berzh Rannvro Breizh, Kuzul-departamant Penn-ar-Bed, Kuzul-departamant ar Morbihan, hag a-berzh tiez-kêr 'zo pa reont an abadenn Webnoz.
4 implijad a zo hag a lak al lec'hienn internet Brezhoweb da vont en-dro; klotañ a ra gant 2 bost-labour leunamzer.
6 000 den a zeu da welet al lec'hienn bep miz ha sellet e vez ouzh ar videoioù 200 gwech an devezh. War-gresk ez a ingal an niver a sellerien. Abadennoù zo, ouzhpenn, a vez implijet er skolioù ha diskouezet d'ar vugale.
Skignadennoù
kemmañ- Webnoz (krouidigezh)
- Ken Tuch' (krouidigezh)
- Dibikouz (krouidigezh)
- Saga Brittia (krouidigezh)
- Short cuts (film advouezhiet)
- Planedenn Wenn (film advouezhiet)
- Apollo 13 (film advouezhiet)
- Marc'h al lorc'h (film advouezhiet)
- Ar Wagenn (Die Welle) (film advouezhiet)
- C'hoari ha Deskiñ (c'hoari skinwel)
Prizioù
kemmañMeur a abadenn produet gant Brezhoweb a zo bet dibabet pe rakdibabet e Gouel ar Mediaoù Keltiek, ur festival aozet bep bloaz en unan eus ar broioù keltiek evit brudañ ar pezh a vez graet war dachenn ar mediaoù e yezhoù keltiek.
- 2008 : Brezhoweb : Lec'hienn web rakdibabet e Gouel ar Mediaoù Keltiek e-barzh ar rummad « Mediaoù niverel ».
- 2009 : Ken Tuch' : Sitcom rakdibabet e Gouel ar Mediaoù Keltiek e-barzh ar rummad « Yaouankiz ».
- 2010 : Saga Brittia : Heuliadenn istorel rakdibabet e Gouel ar Mediaoù Keltiek e-barzh ar rummad « Yaouankiz ».
- 2011 : Brezhoneg Bemdez : Heuliadenn rakdibabet e Gouel ar Mediaoù Keltiek e-barzh ar rummad « Yaouankiz ».
- 2014 : War an ton bras : Magazine dibabet e Gouel ar Mediaoù Keltiek e-barzh ar rummad « Abadenn dudiañ »[4].
- 2015 : Fins a la victòria : Teulfilm 52 mn diwar-benn Katalonia, istitlet e brezhoneg, galleg ha katalaneg, dibabet e Gouel ar Mediaoù Keltiek e-barzh ar rummad « Teulfilmoù »[5]. Berzh en deus graet ar reportaj-mañ e Breizh hag e Katalonia, 10 000 a dud o deus sellet ouzh an teulfilm daou zevezh goude ma oa bet lakaet enlinenn ha 100 000 goude ur sizhunvezh, an hanter anezho a oa e Katalonia[6],[7].
Brezhoweb a zo bet ivez priziet pe war ar renk meur a wech evit Prizioù dazont ar brezhoneg.
- 2007 : Brezhoweb.com : Al lec'hienn wellañ e brezhoneg priziet gant ar Prizioù e-barzh ar rummad « Lec'hienn internet ».
- 2010 : Ken Tuch' : Sitcom priziet evel ar wellañ oberenn kleweled gant ar Prizioù.
- 2014 : War an ton bras : Magazin priziet (3de plas) gant ar Prizioù e-barzh ar rummad « Oberenn kleweled ».
- 2021 : 13 munud e Bzh : Heuliad teulfilmoù priziet (3de plas) gant ar Prizioù e-barzh ar rummad « Oberenn kleweled »[8].
Disprizioù
kemmañ- Gwelout ar pennad Disprizioù
Liamm diavaez
kemmañNotennoù ha daveennoù
kemmañ- ↑ Ar festival EHZ, ur skouer evit ar Vretoned ? - 4 munud e Breizh istitlet e euskareg, Kanaldude, d'ar 27 a viz Eost 2024
- ↑ Bañolet (film euskarek istitlet e brezhoneg), war lec'hienn Brezhoweb, d'ar 5 a viz Gouere 2024
- ↑ Manifestadeg - Evit ma chomo bev hor yezhoù, reportaj kenbroduet gant Brezhoweb, Kanaldude hag Òc Tele, d'an 30 a viz Du 2019
- ↑ (en) Competition shortlist (pajenn 13), Gouel ar Mediaoù Keltiek, miz Ebrel 2014
- ↑ (en) Competition shortlist (pajenn 9), Gouel ar Mediaoù Keltiek, miz Ebrel 2015
- ↑ (ca) Berzh bras a ra un teulfilm brezhonek diwar-benn stad Katalonia, Ara, d'ar 14 a viz Gwengolo 2014
- ↑ (fr) Le breton en Catalogne, Ouest France, d'an 21 a viz Gwengolo 2014
- ↑ Prizioù Dazont ar brezhoneg 2021, al loreidi, France TV Pro, d'an 22 a viz Meurzh 2021
|
|
Porched Breizh – Adkavit pennadoù ha rummadoù Wikipedia a denn da Vreizh. |