Gwereg (dug Breizh)

Gwereg (dug Breizh)
Dug Breizh
Ren	981—988
A-raok	Hoel Iañ
Goude	Alan Breizh
Kont Naoned
Ren	981—988
A-raok	Hoel Iañ
Goude	Alan Breizh
Buhez
Marvet	988
Bez	Abati Sant Salver, Redon, Breizh
Tiegezh	Naoned
Tad	Alan II, dug Breizh
Mamm	Judit
Priedoù	Aremburge Ankiniz
Diskennidi	Alan Breizh, dug Breizh
Relijion	Katolik

Gwereg, pe Gwereg Breizh, ganet war-dro 933 ha marvet e 988, anezhañ mab bastard da Alan II, dug Breizh, ha d'ur briñsez Judit, a oa kont Naoned, eus 981 betek 988.

E vuhez

Savet e voe en abati Saint-Benoît-sur-Loire tost da Orleañs. Dilennet e voe da eskob Naoned e 981, hep bezañ eskobet gant an Iliz pa ne oa ket beleg, hag ober a reas war dro an eskopti hag ar gontelezh war un dro.

Dug Breizh

Anvet voe da zug Breizh e 981, war-lerc'h marv e vreur, Hoel Iañ.

Kenderc'hel a reas gant stourm e vreur ouzh Tiegezh Roazhon. En em glevet e oa gant Jafrez Grisegonel, kont Anjev, a-enep Konan an Tort, kont Roazhon ha dug Breizh .

E-penn arme an Naonediz e oa da vare Kentañ Emgann Konkerel.

En emglev a sinas gant ar c'hont Gwilherm IV Poatev e oa anavezet perc'henniezh kont Naoned war an douaroù er c'hreisteiz d'al Liger war pagi Herbauges, Tiffauges ha Mauges - anezho douaroù kemeret gant e dad Alan II en 942.

Prizoniet

E 983 edo Gwereg o klask kaout an disamm eus aotrouniezh Anjev hag ezhomm en doa da skoulmañ emglevioù. Mont a reas da lez Lotar, roue Frankia ar C'hornôg, da ober e enorioù dezhañ. Gwelloc'h e kave un aotroù a -bell evit unan a-dost.

War hent ar gêr e chomas a-sav e ti e amezeg Jafrez Iañ, kont Anjev. Ha prizoniet e voe. Ne voe dieubet nemet e 985, ret dezhañ anavezout aotrouniezh Jafrez war gontelezh Naoned. Bec'h a voe etre ar roue frank ha kont Anjev, a glaskas neuze ober emglev gant Hugues Capet.

E varv

Drouklazhet e voe e 988 gant e vedisin Heroicus, abad abati Redon, hag a vije bet paeet gant Konan an Tort, en devoa lakaet lazhañ Hoel, e vreur, meur a vloaz a-raok.

Beziet e voe Gwereg en abati Redon.

Dimeziñ

Dimezet e oa da Aremburge, itron a Ankiniz, ur mab o doa bet, Alan Breizh, a varvas daou vloaz war-lerc'h e dad.

Dihelloù

Anavezet eo buhez Gwereg hag e vreur Hoel dre Kronik Naoned dastumet en XI^vet kantved, ur skrid gwalldroet ouzh ar Vretoned dre vras, hag ouzh Tiegezh Roazhon muioc'h c'hoazh.

• Kronikenn Naoned => Gallica http://gallica.bnf.fr/ark:/12148/bpt6k55624v

Levrlennadur

• André Chédeville & Noël-Yves Tonnerre La Bretagne féodale Patrom:Sp-. Ouest-France Université Rennes (1987) (ISBN 2727200122).
• Naissance de la Bretagne. Géographie historique et structures sociales de la Bretagne méridionale (Nantais et Vannetais) de la fin du VIII^e à la fin du XII^e, Noël-Yves Tonnerre Presses de l’Université d’Angers Angers (1994) (ISBN 2903075589).

En e raok: Hoel Iañ

Rouaned ha Duged Breizh 981 – 988

War e lerc'h: Konan Kentañ a Vreizh