Lewis (fuzuilh-vindrailher)
Evit implijoù all, gwelet Lewis (disheñvelout).
Al Lewis zo un fuzuilh-vindrailher ijinet e 1911 er Stadoù-Unanet met produet en Europa hepken[1]. Unan eus an armoù-tan brudetañ implijet gant armeoù ar Rouantelezh-Unanet da vare ar Brezel-bed Kentañ eo[2].
| Fuzuilh-vindrailher Lewis | |
|---|---|
 Ur fuzuilh-vindrailher Lewis Mk I. | |
| Kinnig | |
| Bro orin |  Stadoù-Unanet Amerika
|
| Mont en-dro | Fuzuilh-vindrailher aotomatek |
| Munisionoù | Stummoù nesañ .303 British .30-06 Springfield Stummoù all 7,92 × 57 mm Mauser 7,62 × 54 mm R |
| Produerien | Birmingham Small Arms Savage Arms |
| Bloavezh krouidigezh | 1911 |
| Mare implij | 1914 - 1953 (Rouantelezh-Unanet) |
| Pouez ha muzulioù | |
| Mas (hep kartouchenn) | 13 kg |
| Hirder | 1.283 mm |
| Hirder ar c'hanol | 673 mm |
| Perzhioù all | |
| Lusk-tennañ | 500 - 600 tenn/mn |
| Hed-tenn pleustrek | 800 m |
| Tizh mont e-maez ar boledoù | 744 m/s |
| Endalc'h | Kargerioù ront 47 pe 97 kartouchenn |
| Stummoù nesañ | Mark I, Mark II |
| Lezenn | |
| Rummad e Bro-C'hall | A |
Istor
kemmañ
Ijinet e voe e 1911 gant Isaac Newton Lewis[2], a oa koronal e arme ar Stadoù-Unanet, diwar dresoù armoù aotomatek en doa savet asambles gant Samuel McClean a-raok 1909. Lewis a zegasas ur sistem-yenaat dre aer, ha lakaat a reas skouerennoù eus e arm, kambret e .30-06 Springfield, da vezañ produet gant Savage. Ne zeuas ket a-benn da werzhañ e fuzuilh-vindrailher d'an arme stadunanat, ha kuitaat a reas an arme evit mont da Europa. Eno e klaskas da gentañ lakaat e arm da vezañ produet e Liège. Mont a reas goude da Londrez, ha plijet e voe an arme vreizhveurat gant e fuzuilh-vindrailher. Un nebeud miliadoù a skouerennoù a urzhias e 1914. Adkambret e voent e .303 British ha produet gant BSA[3], dindan an anv Lewis Mark I.
Pa badas ar brezel e voe produet ouzhpenn 147.000 Lewis gant BSA[4]. A-benn ar fin e voe implijet ivez gant armeoù ar Stadoù-Unanet ha Kanada adalek 1917. Ur stumm Mark II, skañvaet e sistem-yenaat, a voe savet e 1915 evit bezañ lakaet war-vourzh ar c'hirri-nij[2]. Servijout a reas an arm da vare an Eil Brezel-bed ivez, etre daouarn soudarded broioù ar C'hommonwealth pe reoù an adarme evel an Home Guard dreist-holl[1]. War-dro 200.000 skouerenn anezhañ a voe produet en holl etre 1914 ha 1953.
Daveennoù
kemmañ- ↑ 1,0 ha1,1 (fr) McNAB Chris, Armes à feu Encyclopédie visuelle, L'Imprévu, 2022, p. 243
- ↑ 2,0 2,1 ha2,2 (fr) POTTIEZ Luc, La mitrailleuse Lewis, Horizon 14-18 (lennet d'an 09/09/2024)
- ↑ (fr) GUILLOU Luc, Les armes de la bataille de la Marne, Gazette des Armes n°576, miz Gouere/Eost 2024, pp. 33-34
- ↑ (fr) Lewis Mark I war Arme et passion (lennet d'an 09/09/2024)
