Savage Arms

Savage Arms zo un embregerezh armoù-tan hiniennel stadunanat diazezet e Westfield (Massachusetts).

Istor

Bruderezh evit fuzuilhoù ha karabinennoù Savage Arms, 1904.

Krouet e voe Savage Arms e 1894 e Utica (Stad New-York) gant Arthur Savage (1857-1938), ur Breizhveurad ganet e Kingston (Jamaika) hag erruet er Stadoù-Unanet e 1893^[1]. E 1899 e kinnigas ar Model 99, ur garabinenn loc'henn-grogenn dezhi ur c'harger-tro a reas berzh hag a voe produet betek 1997.^[2] Klask a reas an embregerezh kinnig ur bistolenn kambret e .45 ACP da arme ar Stadoù-Unanet e 1908, met korbellet e voe ha dibabet ar Colt M1911 en e blas^[1].

Tresadenn propaganda stadunanat (war-dro 1942-1943) hag a ziskouez ar War Production Board o kanañ meuleudi da Savage evit an niver a armoù produet.

E 1912 e werzhas Arthur Savage e embregerezh, a viras e anv. E-pad ar Brezel-bed Kentañ e produas Savage fuzuilhoù-mindrailher Lewis evit ar c'hirri-nij brezel hag armoù hiniennel evit ar Stadoù-Unanet, Frañs, Kanada ha Portugal. Goude ar brezel e kreskas e stal, o prenañ embregerezhioù all evel J. Stevens Arms e 1920. Er bloavezhioù 1930 e laboure 3.000 den evit Savage. E 1941 ez eas ar Stadoù-Unanet tre en Eil Brezel-bed. E-pad ar brezel e produas an embregerezh e-tro 1.400.000 pistolenn-vindrailher Thompson, ouzhpenn ur milion a fuzuilhoù Lee-Enfield Mark IV ha mindrailherezioù .30 ha .50 evit ar c'hirri-nij brezel^[2].

Goude ar brezel e tiskennas ar goulenn war an armoù-tan ha ne zeuas ket Savage a-benn da dalañ mat ouzh an endroadur-se. 3 uzin a voe serret ha dilojañ a reas al labouradeg a chome da Westfield, el lec'h m'emañ bremañ^[2].

E 1988 e voe graet freuzstal gant Savage Arms. Choazet e voe Ron Coburn evel prezidant^[1]. Adaozañ a reas an embregerezh penn-da-benn. Tennet e voe an holl armoù kozh diwar katalog ar merk war-bouez ar c'harabinennoù-morailh Model 110. Diwar ar 479 implijad e chomas 103 da labourat en ti hepken^[2]. Strivoù a voe graet evit gwellaat peuraoz ha neuz an armoù en ur cheñch ar c'hoad implijet da skouer. Coburn a brenas an embregerezh e 1995.

Ar strollad embregerezhioù Vista Outdoor a oa perc'henn war Savage etre 2013 ha 2019. Savage Arms a brodu hiziv-an-deiz karabinennoù, fuzuilhoù-chase hag un nebeud armoù-dorn, dindan an anvioù merkoù Savage ha Stevens^[3].

Produioù an embregerezh

Ar Savage Model 99

Karabinennoù ha fuzuilhoù

Model 99
Model 110
Model 720
Model 745
Model 64
Model Mk 1
A17/A22
B17/B22
Model 67
Model 69
Model 24
Model 93

Pistolennoù

Savage Model 1907
rummad Micro Compact
kopiennoù ar Colt M1911

Munisionoù ijinet gant Savage^[1]

.303 Savage
.22 Savage Hi-Power
.250-3000 Savage
.300 Savage

Daveennoù

↑ ^1,0 ^1,1 ^1,2 ha^1,3 (en) FORTIER David M., A history of Savage Arms war Fire Arms News, 06/01/2022 (lennet d'an 12/05/2024)
↑ ^2,0 ^2,1 ^2,2 ha^2,3 (en) FORTIER David, A brief history of Savage Arms e Rifle Shooter, 22/06/2011 (lennet d'an 12/05/2024)
↑ (en) Firearms war lec'hienn an embregerezh (lennet d'an 12/05/2024)

Stag eo ar bajenn-mañ ouzh Porched an Armoù-tan

[:0-1] 1,0 ^1,1 ^1,2 ha^1,3 (en) FORTIER David M., A history of Savage Arms war Fire Arms News, 06/01/2022 (lennet d'an 12/05/2024)

[:1-2] 2,0 ^2,1 ^2,2 ha^2,3 (en) FORTIER David, A brief history of Savage Arms e Rifle Shooter, 22/06/2011 (lennet d'an 12/05/2024)

[3] (en) Firearms war lec'hienn an embregerezh (lennet d'an 12/05/2024)

[1]

[2]

[3]