Emgann Blaen

Emgann Jengland
Maread	24 a viz Mae 843
Lec'h	Blaen Breizh
Disoc'h	Trec'h peurglok Nevenoe/ Erispoe hag Lambert II Naoned
Emgannerien
Dugelezh Breizh;	Kontelezh Naoned
Pennoù-brezel
Nevenoe; Erispoe; Lambert II Naoned	Renaud Naoned;
Niver a emgannerien
Dianav	Dianav
Kolloù
Dianav (izel)	Dianav (uhel)

Emgann Blaen a c’hoarvezas d’ar 24 a viz Mae 843 e-kichen Blaen, e Bro-Naoned, etre un arme Bretoned, renet gant Erispoe, priñs Breizh, ha gant Lambert II, kont Naoned, ha soudarded frank Renaud d’Herbauges, kont Poitiers ha kont Naoned. Faezhet e voe ar Franked hag astennet e voe domani ar Vretoned war-zu ar gevred, e kontelezh Naoned. War e seblant e oa klañv bras Nevenoe, setu perak en devoa fiziet al lu da Erispoe.

Emgann Mezeg

Nevenoe, a oa savet a-enep an impalaer frank Karl Voal ha lakaet kurunenn Breizh war e benn, a felle dezhañ astenn e c’halloud war-zu ar reter. Gant Karl Voal e oa bet fiziet marzoù gevred Breizh er c’hont frank Renaud, ar pezh a oa displijet kaer d’ar c’hont Lambert II, a oa bet kont Naoned diagent. Emglev a reas Lambert gant Nevenoe eta da glask adtapout e zouar. Kerzhet a reas armead ar Vretoned, renet gant Nevenoe hag e vab Erispoe, war-du ar stêr Gwilen. Er gevred edo soudarded frank Renaud d'Herbauges o kerzhet eus Naoned war-du ar Gwilen, da dagañ ar Vretoned. En em gavout a reas an div arme tal-ouzh-tal e Mezeg ha gant ar Franked ez eas an trec’h.

Emgann Blaen

Pa gave dezhañ e oa bet faezhet ar Vretoned e kerzhas Renaud war-du Naoned en-dro. E-kichen Blaen e chomas a-sav da ziskuizhañ war ribl an Izar. Neuze e voent taget gant daou arme, hini Erispoe, deuet eus ar Gwilen, ha hini Lambert, deuet eus ar reter. Kelc’hiet e voe arme Renaud ha dismantret e voe gant o enebourien.

Lazhet e voe Renaud en emgann^[1]^,^[2]^,^[3] Hervez lod eus an istorourien avat e oa bet lazhet e Mezeg.^[4].

Disoc'h

Goude an trec’h-se, ha trec’hioù all, gant ar Vretoned, e voe sinet Feur-emglev Angers gant Karl Voal hag Erispoe, e 851. Gant ar feur-emglev-se e voe anavezet Erispoe da roue Breizh gant Karl Voal, hag anavezet e voe ivez e oa broioù Roazhon, Naoned ha Raez e Breizh. Evel-se e oa lakaet sklaer petra e oa ar vevenn etre Breizh ha Frankia ar C'hornôg.

30 Devezh war-lerc'h e oa aloubet kêr Naoned gant ar vikinged. Ur wech aet kuit e voe fiziet Naoned da Lambert II ha peurrest ar gontelezh da mab Renaud d'Herbauges.

Notennoù

↑ Kronik Naoned
↑ Janet L. Nelson, The Annals of St-Bertin, Manchester University Press, 1991, p.55
↑ Didacus Antoine Jérôme Marius de Bodard de La Jacopière, Chroniques craonnaises, 1871, p.104 Lenn enlinenn
↑ Patrick Galliou, Michael Jones, Les anciens Bretons, p. 138

Levrlennadur

Patrick Galliou, Michael Jones, Les anciens Bretons, , Armand Colin, Paris, 1993
André Chédeville, Hubert Guillotel, La Bretagne des saints et des rois Ve-Xe siècle, embannadurioù Ouest-France, Skol-veur Roazhon, 1984.
René Merlet, Gallica Chronique de Nantes rédigée au XIème siècle

[1] Kronik Naoned

[2] Janet L. Nelson, The Annals of St-Bertin, Manchester University Press, 1991, p.55

[3] Didacus Antoine Jérôme Marius de Bodard de La Jacopière, Chroniques craonnaises, 1871, p.104 Lenn enlinenn

[4] Patrick Galliou, Michael Jones, Les anciens Bretons, p. 138

[1]

[2]

[3]

[4]