Trivia monacha

Trivia monacha
Kudenn ebet (LC)
Rummatadur filogenetek
Riezad :	Animalia
Skourrad :	Mollusca
Kevrennad :	Gastropoda
Urzhad :	Littorinimorpha
Kerentiad :	Triviidae
Genad :	Trivia
Anv skiantel
Trivia monacha (da Costa, 1778)
D'ar vevoniezh e tenn ar pennad-mañ.

An hoc'higed-mor europat gant pikoù^{(Daveoù a vank)} zo blotviled bihan eus Eurazia a ya d'ober ar spesad Trivia monacha. Renket int bet e-pad pell en hevelep spesad hag ar spesad all Trivia arctica hag a vev e hevelep lec'hioù. An diforc'h anatañ etrezo eo an tri merk gell teñval a zo ouzh kein Trivia monacha ha n'en deus ket Trivia arctica.

Graet e vez anezho e yezhoù tro-war-dro "spotted cowrie", "false cowrie" ha "British trivia" e saozneg, "Europäische Kauri" en alamaneg, "gevlekt koffieboontje" en izelvroeg, "grain de café", "cochon", "pucelage" ha "porcelaine puce" e galleg.

Bevoniezh

Orañjez-gell eo liv mantel, proboscis, brec'helloù ha troad al loen bev. Gell eo ar grogenn gant 3 roud gellteñval pe du.

Kavet e vezont etre 0 ha 100 m donder e morioù Europa. Gallout a reer kavout lod anezho kuzhet dindan reier izeloc'h evit ar mareoù izel. Kregin al loened marv a vez kavet a-wechoù war an traezh. War aodoù Breizh e vezont dastumet ingal ha dibaoe pell.

Kigdebrerien int hag an Ascidiacea a seblant bezañ o fredoù pennañ.

Taksonomiezh

Anv ar genad Trivia a dalv "boutin" hag hini ar spesad "monacha" a dalv "e-unan", "evel ur manac'h".

Diskrivet eo bet ar spesad gant Da Costa e 1778.

Implij

N'int ket boued evit Mab-den, met dibaoe pell e vezont dastumet evel objedoù brav da vezañ implijet evit kinkladurioù.

Kavet ez eus bet troioù-gouzoug graet ganto e bez Tevieg (korfoù div vaouez bet douaret gant objedoù etre 5 000 ha 7 000 bloaz a-raok Jezuz-Krist e Krennoadvezh ar maen) en enezenn Tevieg e kumun Sant-Pêr-Kiberen.

• 
  Bez Tevieg e Sant-Pêr-Kiberen gant an div skeledenn hag ar c'hinkladurioù en o zouez un hoc'hig-mor Monetaria annulus
• 
  Skeledennoù gant bravigoù graet gant trivia
• 
  Skeledennoù gant bravigoù graet gant trivia
• 
  Hoc'hig-mor Europa gant pikoù bev gant e gorf oranjez
• 
  Trivia monacha gwelet a-gostez
• 
  Trivia monacha gwelet a bep kostez