Amzer-dremenet (yezhoniezh)

Ur pennad amzer-dremenet zo ivez.

Er yezhoniezh e vez implijet an termen amzer-dremenet evit komz eus un amzer yezhadurel a dalvez da deskrivañ un ober pe un darvoud c'hoarvezet a-raok ar mare m'emeur o komz (amzer-vremañ) en ur reizhiad rik pe c'hoazh a-raok ur mare all m'emeur o komz diwar e benn, lakaet da daveenn amzeriañ en ur reizhiad keñveriek.

Yezhoù ar bed

Alies e tiforc'h yezhoù ar bed etre an arvez strizh hag an arvez ledan (amdremenet) en amzer-dremenet, da skouer:

• Arvez strizh

e brezhoneg: debras (debret en deus / debriñ en deus graet)

e saozneg: he has eaten

e galizeg: comeu

• Arvez ledan

e brezhoneg: debre

e saozneg: he ate

e galizeg: comía

Yezhoù all avat ne verkont ket an amzer-dremenet en o yezhadur war-eeun, oc'h ober kentoc'h gant adverboù seul wezh mar bez ezhomm, da skouer

• E sinaeg:

我 买 书

(wǒ mǎi shū)

"me pren levr" = "prenañ a ris/ran/rin..."

我 昨 天 买 书

(wǒ zuótiān mǎi shū)

"me dec'h pren levr" = "dec'h e prenis..."

En tu kontrol ez eus meur a yezh komzet en Amerika, en o zouez an navac'hoeg, implijet gante ur reizhiad verbel luziet-tre gant merkoù amzeriañ spis pe spisoc'h a bep seurt..

Gant ar yezhoù bantouek e tiforc'her etre an amzer-dremenet pellañ hag an amzer-dremenet tostañ.

E brezhoneg

E brezhoneg ivez e tiforc'her etre an arvez strizh, merket gant an amzer-dremenet strizh hag an amzer-dremenet amstrizh diouzh un tu hag an arvez ledan diouzh an tu all, merket gant an amzer-amdremenet, da skouer:

• Arvez strizh

Debriñ a reas / Bez' e tebris / Eñ a zebras

Debret en deus / Debriñ en deus graet

• Arvez ledan

Debriñ a rae / Bez' e tebre / En a zebre

Kemm a lakaer ivez e brezhoneg etre an arvez boas hag an arvez pad en amzer-dremenet, da skouer:

• Arvez boas

Pa veze er gêr

Riv am beze e-pad ar goañv

O hadañ e veze

• Arvez pad

Edo o hadañ / O hadañ e oa

Gwelit ivez:

• Amzer-dremenet strizh
• Amzer-dremenet kevrennek
• Amzer-amdremenet
• Amzer-beurdremenet
• Amzer-vremañ
• Amzer-da-zont