Amzer-dremenet strizh

Er yezhadur ha yezhoniezh e vez lavaret amzer-dremenet strizh (e latin: praeteritum) eus un amzer yezhadurel en tremened hag a dalvez da zeskrivañ un ober pe un darvoud peurachu a-raok ar mare m'emeur o komz (amzer-vremañ) en ur reizhiad amzerioù rik pe a-raok ar mare m'emeur o komz anezhañ lakaet da zaveenn en ur reizhiad keñveriek.

E berr-gomzoù e talvez an amzer-dremenet strizh da verkañ an amzer-dremenet en un tu hag an arvez strizh en tu all war un dro, enebet ouzh an amzer-amdremenet amstrizh, da skouer:

Bez' e lennas

Lenn a reas

Klañv e voe

Brezhoneg

E brezhoneg e c'heller sevel an amzer-dremenet strizh hervez an tri doare displegañ boas, da skouer gant ar verb "hadañ"

• Displegadur eeun hep raganv gour:

Bez' e hadis

Bez' e hadjout

Bez' e hadas (eñ/hi)

Bez' e hadjomp

Bez' e hadjoc'h

Bez' e hadjont

Bez' e hadjod

• Displegadur eeun gant ur raganv gour:

Me a hadas

Te a hadas

Eñ a hadas

Hi a hadas

Ni a hadas

C'hwi a hadas

Int a hadas

• Gant ar verb-skoazell "ober":

Hadañ a ris

Hadañ a rejout

Hadañ a reas (eñ/hi)

Hadañ a rejomp

Hadañ a rejoc'h

Hadañ a rejont

Hadañ a rejod

Ne vez implijet nemeur an amzer-dremenet strizh er yezh komzet avat, implijet kentoc'h en e lec'h an amzer-dremenet kevrennek, displeget gant ar verb-skoazell "ober" pe heptañ, da skouer:

Lennet en deus pe Lenn en deus graet e lec'h Lenn a reas pe Bez' e lennas

Yezhoù all

Yezhoù romanek

Galleg

Ne vez implijet an amzer-dremenet strizh nemet dre skrid gant ul live-yezh lennegel er galleg a-vremañ, implijet en he lec'h a-hendall an amzer-dremenet kevrennek, da skouer:

il a été e lec'h il fut ("bez e voe")

ils ont fait e lec'h ils firent ("ober a rejont")

Spagnoleg

E spagnoleg e vez enebet an amzer-dremenet strizh ouzh an amzer-dremenet kevrennek hag ivez ouzh an amzer-amdremenet, disheñvel takas implij pep hini an eil e-keñver ar re all, da skouer:

• Tremened strizh

fue ("bez' e voe")

comió ("bez' e tebras")

• Tremened kevrennek

ha sido ("bet eo")

ha comido ("debret en deus")

• Amdremenet

era ("bez' e oa")

comía ("bez' e tebre")

Galizeg

E galizeg n'implijer verb kevrennek ebet, ha neuze ne vez enebet an amzer-dremenet strizh ouzh amdremenet nemetken, da skouer:

• Tremened strizh

foi ("bez' e voe")

comeu ("bez' e tebras")

• Amdremenet

era ("bez' e oa")

comía ("bez' e tebre")

Yezhoù germanek

Saozneg

E saozneg e stager an dibenn "-(e)d" ouzh gwrizienn ar verboù reizh evit sevel diwarne an amzer-dremenet strizh. Ne gemm ket stumm ar verb nag evit merkañ ar gour nag evit merkañ an niver, da skouer:

to look ("sellet") -> looked

to carry ("dougen") -> carried

to dance ("dañsal") -> danced

Meur a verb amreizh ez eus avat, savet an amzer-dremenet strizh alies dre kemmañ vogalenn bennañ gwrizienn ar verb, da skouer:

to run ("redek") -> ran

to sing ("kanañ) -> sang

to think ("soñjal") -> thought

to drive ("kas ur karr-tan") -> drove

to bind ("stagañ" -> bound

to be -> was

Alamaneg

Er yezh unvan e tiforc'her, dres evel e saozneg, etre an amzer-dremenet strizh (Präteritum) hag an amzer-dremenet kevrennek :

• Dremenet strizh:

Heute früh kam mein Freund

"Deuet e oa ma c'heneil hiziv evit beure" : ha kaozeal a reer diwar e benn en amzer-dremenet ; da lâret eo, n'eo ket "hiziv" ken

• Dremened kevrennek:

Heute früh ist mein Freund gekommen

"Dont a reas ma c'heneil hiziv evit beure" : ha kaozeal a reer diwar e benn en amzer-vremañ c'hoazh ; da lâret eo, ec'h eo "hiziv" c'hoazh

E Norzh Alamagn e tiforc'her c'hoazh etre implij an amzer-dremenet strizh hag implij an amzer-dremenet kevrennek. E su ar vro avat e vezer techet da implijout an amzer-dremenet kevrennek nemetken hag oc'h ober gant an amzer-dremenet strizh dre skrid.

Gwelit ivez:

• Amzer-dremenet
• Amzer-amdremenet
• Amzer-dremenet amstrizh