Gored

Ur pennad Gored (kumun) zo ivez.

Ur gored zo ur seurt stankell, pe ur skluz-pesked, savet war an aod da dapout pesked. Evel en ur c'havell bras pe un antell, e stankont an hent d'ar pesked a vez trapet e-barzh. Lod anezho a zo bet savet da vare ar Ragistor. Anavezet eo ar ger e lec'hanvadurezh Breizh koulz hag hini Kembre, Bro-Skoz ha Bro-Iwerzhon.

Aspadennoù ur gored eus ar Grennamzer, war un aod-traezh en Enez Mon.

Gored en un aber.

Gored amerindian gant Algonkined hervez John White, e 1585.

Breizh

Kavet e vez koredoù kozh e pep lec'h e Breizh. Stankoc'h int war vord ar mor, e-lec'h ma vez uhel an douar e keñver mor. Niverusoc'h int neuze en hanternoz, etre Lambaol-Blouarzhel ha Bae Menez Mikael e Normandi. Un neubeut deus outo a zo bet savet er stêrioù. Daoust ma vichent bet savet e mein-greun, kaset ha digaset int bet gant an houl a-dreuz an amzer. Dilec'hioù koredoù int toud. Ne ouezer ket re vad peseurt pesk a veze paket ganto, na pegement. Alies int bet savet harp ouzh ar reier. Unan hir a 120 metrad a zo e Landeda. War ar stêrioù, e stankont an hent d'ar zomoñ o tivroañ.

Skouer Santeg

E Santeg ez eus bet kavet 34 anezho, darn eus ar Ragistor, re all eus ar Grennamzer. Anvioù 'zo a zo bet adkavet : Gored Levran, Gored Kamm, ar Gored kozh, Gorbont Pekud, Gorbont Enez Rouz, Gorbont ar Staol.

Lec'hanvioù all

• ar Gored, traezhenn e Plozeved
• Penn ar Gored, e Porspoder
• Roc'h ar Gored, e Briad, a vefe kentoc'h Roc'h ar Gorred
• ar C'horejou, e Plougerne
• ar Gored, e Ploueskad
• Penn ar Gored, e Porspoder
• Porzh ar Gored, e Perroz-Gireg
• Kerhored, Poullaouen

Kembre

Hervez mojenn Taliesin e oa bet lakaet war vor en ur c'havell gant e vamm, ha kavet en ur gored a oa da Gwyddno Garanhir war an aod etre ar stêr Dyfi hag Aberystwyth.

Goredoù a oa er Menai, evel en Ynys Gored Goch, pe hini Rhos Fynach ac'h eas en-dro betek ar brezel-bed kentañ.

Lec'hanvioù kembraek

• Ynys Gored Goch
• Gored Beuno

Bro-C'hall

Kavet e vez goredoù en inizi Oléron, Ré ha Noirmoutier. E hanternoz Bro-C'hall e veze savet koredoù e prenn hag ozilh.

Skeudennoù

• 
  E Kanada, en Ontario, ur gored amerindian, eus ar bobl Mnjikaning
• 
  E Danmark
• 
  E Virginia, SUA, gored amerindian savet gant mein.
• 
  En Izelvroioù, en Bergen op Zoom
• 
  E Kembre
• 
  E Japan, war ar stêr Mogami
• 
  E Republik Kongo.
• 
  E Bro-Saoz, e Countisbury Cove, e Somerset.
• 
  E Bro-C'hall, en Enez Ré , e Saint-Clement-des-Baleines.
• 
  En Enez Ré , e Sainte-Marie-de-Ré.
• 
  En Chile, e Chiloé.