Riwanon Kervella

Riwanon Kervella (Landreger, ganet e miz Kerzu 1950) zo ur skrivagnerez hag un embannerez vrezhonek. Aet eo da brezidantez Kuzul ar Brezhoneg goude bezañ bet renerez Skol Ober. Savet ha troet he deus un toullad testennoù ha pennadoù brezhone. Oberiant eo e Skourr Breizh ar C'hendalc'h Keltiek.

Riwanon Kervella, renerez Skol Ober ha Kuzul ar Brezhoneg

Buhez

Bevet he deus he bugaleaj e Lannuon. Merc'h eo d'ar yezhadurour Frañsez Kervella ha d'e bried Ivetig an Dred-Kervella. Emañ o vevañ bremañ en ur bourkig a Vro-Dreger. Studiet he deus saozneg ha brezhoneg e Roazhon ha bet eo e Kembre e-pad bloaz, m'he doa labouret. Bet he deus ivez ur vestroniezh war ar brezhoneg. Kelennet he deus brezhoneg e skol-veur Gaillimh en Iwerzhon e-pad bloaz.

Abaoe 1977 e ra war-dro Skol Ober, koshañ skol dre lizher e Breizh evit deskiñ brezhoneg. Bet eo bet betek 400 den a laka o anv bep bloaz e Skol Ober, met digresket zo bet an niverenn da 100 ha betek 42 gelenner a-youl-vat a zo bet ouzh o sikour da zeskiñ pe da beurzeskiñ yezh ar vro.

Gant e vreur, Divi Kervella, (marvet e 2017), hag ur mignon, Maoris Joubin, he deus savet an ti-embann An Alarc'h e 2003 hag embannet e vez ganto meur a levr brezhonek bep bloaz.

Labourat a ra gant meur a di-embann brezhonek dre he c'harg e Kuzul ar Brezhoneg, un digarez da gejañ gant tud a bep seurt, danvez skrivagnerien en o zouez.

Atersadenn

• Peseurt sell zo ganeoc'h war al lennegezh vrezhonek ?

RK : "Al lennegezh vrezhonek zo fonnus a-walc’h, n’eus bet koulz lavaret troc’h ebet en istor ar yezh skrivet a-hed ar c’hantvedoù. Dre al lennegezh e komprener istor Breizh ha hini ar bobl, an darvoudoù a zo bet c’hoarvezet ha temz-spered an dud da vareoù resis. Gwerzioù kozh sant Telo pe sant Ronan, koulz hag ar Rannoù a gaver er Barzhaz Breizh, pe c’hoazh kalz tostoc’h ouzhimp, skridoù Jakez Riou pe Jarl Priel a chomo bev da viken hag a vo lennet bepred gant ar memes plijadur."

• Eus pelec'h e teu deoc'h an dedenn evit ar brezhoneg ? Hag evit ar skridoù e brezhoneg ?

RK : "Pa oan bihan e oa levrioù tro-dro din ha lennet em eus bet a bep seurt traoù disheñvel e brezhoneg hag e galleg. Brezhoneg e oa yezh an ti setu e oa un dra naturel komz, lenn ha skrivañ e yezh ar vro. Chañs am eus bet d’anavezout meur a skrivagner ha skrivagnerez e brezhoneg ha pa anavezer an dud e vez muioc’h a c’hoant da lenn o skridoù."

Oberennoù

Troidigezhioù

• Gwerz ar Guardia Civil Espanola diwar Federico García Lorca
• Kontadennoù gant Musaeus
• Breizh Thriller, ul levr skrivet gant skolajidi eus Roazhon.

Pennadoù en Al Liamm

• Niv. 131, p. 424 : pennad studi, Ar romantoù polis
• Niv. 153, p. 284 : barzhoneg Skrivañ 'reer ur varzhoneg... troet diwar Roberto Fernandez Retamar
• Niv. 157, p. 110 : barzhoneg Gwerz ar Guardia Civil Española"" troet diwar Federico García Lorca
• Niv. 161, p. 413 : barzhoneg Ma soudardez, troet diwar Roberto Fernandez Retamar
• Niv. 169, p. 88 : danevell, Glav ha daeroù
• Niv. 175, p. 99 : danevell, Taolennig iwerzhonat.
• Niv. 177, p. 235 : barzhoneg Selaou, breur gwenn, troet diwar Atahualpa Yupanqui
• Niv.356, p. 53 : danevell Plac'h al lenn, troet diwar Robin Gwyndaf
• Niv.359, p. 19 : barzhoneg Barzhonegoù Glenmor, troet diwar Glenmor

Levrioù

• (fr) La Cuisine des pays celtes, Des dessins et des mots, 2008 (ISBN 978-2-915050-31-8)
• Pennadoùigoù a-zivout he beajoù e Skandinavia hag en Europa ar Reter ^{(Daveoù a vank)}

Levrlennadur

• Riwanon Kervella. Atersadenn e-barzh Ya!, niv. 979, 12 meurzh 2024.

Notennoù ha daveennoù

Porched Breizh – Adkavit pennadoù ha rummadoù Wikipedia a denn da Vreizh.