Winchester Repeating Arms Company

Ar Winchester Repeating Arms Company a oa ur produer armoù-tan tennata ha munisionoù a bouez e fin an XIXvet ha deroù an XXvet kantved. Krouet e oa bet e 1866 gant Oliver Winchester ha diazezet e oa e New Haven, Connecticut. E adreizhadur barnerezhel e voe lakaet an embregerezh e 1931 ha prenet e voe gant ar Western Cartridge Company a zeuas da vezañ goude an Olin Corporation. Armoù-tan ha munisionoù a vez produet dindan an anv Winchester c'hoazh.

Logo an embregerezh.

Istor kemmañ

 
Oliver Winchester

Horace Smith ha Daniel Wesson, daou armeurer amerikan, a savas e 1855 ar Volcanic Repeating Arms Company da werzhañ o frodu nevez, ar garabinenn Volcanic. Ur produer rochedoù, Oliver Winchester, a brenas ar braz eus lodennoù an embregerezh. Ne reas ket berzh produioù Volcanic hag e 1857 e voe adprenet he dle gant Oliver Winchester, a adaozas anezhi dindan an anv New Heaven Arms Company. Smith ha Wesson a savas diwezhatoc'h Smith & Wesson, un embregerezh armoù brudet.

Berzh a reas an New Heaven Arms Company gant ar fuzuilh Henry, ur fuzuilh dennata hep taboulin ebet, enni 15 kartouchenn.

E 1866 e savas dizemglev etre Benjamin Henry, krouer ar garabinenn Henry, hag Oliver Winchester. Hemañ a adaozas an embregerezh hag adanvet e voe Winchester Repeating Arms Company[1]. E 1880 e varvas Oliver Winchester, evel e vab hag heulier William Wirt un nebeud mizioù war e lerc'h.

Kenlabourat a reas an embregerezh gant an ijinour armoù brudet John M. Browning etre 1883 ha 1898. Frouezhus e voe ar c'henlabour-se ha berzh a reas Winchester d'ar mare-se, ken niverus ha modern e oa an ijinadennoù degaset gant Browning.

Brezel Bed Kentañ kemmañ

 
Bruderezh evit an embregerezh en ur gelaouenn, 1898.
 
Bruderezh evit ar fuzuilhoù Winchester, war-dro 1900.

E-pad ar Brezel Bed Kentañ e produe Winchester fuzuilhoù Enfield M1914 kambret e .303 British evit ar Rouantelezh-Unanet ha fuzuilhoù Enfield M1917 kambret e .30-06 Springfield evit an U.S. Army. Er memes mare ec'h ijinas John Browning ar Browning Automatic Rifle (BAR) hag e voe krouet gant ijinourien Winchester asambles gantañ ar c'halibr munisionoù .50 BMG (12.7 x 99 mm) da vont ennañ.

Kalz arc'hant a oa bet amprestet gant an embregerezh Winchester e-pad ar brezel evit brasaat he froduerezh. Goude ar brezel he doe poan o restaoler an arc'hant-se abalamour da zigresk ar goulenn war an armoù hag ar munisionoù goude 1919. Armoù nevez a voe ijinet evel an M1 Carbine e 1925, met ne zeuas ket an embregerezh a-benn da vont dreist an Enkadenn Veur. Freuzstal a reas hag adprenet e voe gant ar familh Olin.

Eil Brezel Bed kemmañ

E-pad an Eil Brezel Bed e voe produet armoù-tan hiniennel e uzinoù Winchester, evel an M1 Garand hag an M1 Carbine. Goude ar brezel e produas ivez fuzuilhoù M14. Hiziv an deiz e vez implijet c'hoazh ar merk Winchester gant an Olin Company a brodu munisionoù dindan e anv. Daou embregerezh o deus ul lisañs evit produiñ armoù-tan dindan an anv Winchester : an FN Herstal (Belgia) ha Browning (SUA).

 
Maouezed an Auxiliary Territorial Service (Rouantelezh-Unanet) o tougen armoù-tan Winchester da vare an Eil Brezel Bed.

Munisionoù ijinet gant Winchester kemmañ

An embregerezh a ijinas kalibroù munisionoù e-touez ar re vrudetañ, dreist-holl a-drugarez d'e labour gant John Browning. Ar braz anezhe a vez produet c'hoazh. Daou anezhe a zo chomet evel munisionoù standard armeoù AFNA (an .308 en e stumm milourel hag an .50 BMG).

Tro-dro da Winchester kemmañ

  • Er western Winchester '73 (1950) e kemer perzh an aktour James Stewart en ur genstrivadeg evit gounit ur garabinenn Winchester M1873 ispisial : hervez ar vojenn e veze produet ur garabinenn dreistordinal diwar vil gant Winchester, uheloc'h e galite evit ar re all.
  • Dastumadeg armoù, munisionoù ha dafar an embregerezh a zo er mirdi Cody Firearms Museum e Cody, e Wyoming.[2]

Daveennoù kemmañ

  1. Boorman, Dean K., History of Winchester Firearms. Guilford, CT: Lyons Books (2001), p. 19.
  2. Nicholson. 18. Cody Firearms Museum, Cody, WY. Ben Nicholson. Kavet : 29 November 2022.
   Stag eo ar bajenn-mañ ouzh Porched an Armoù-tan