M14 (fuzuilh)
An M14 a zo ur fuzuilh aotomatek pe damaotomatek (hervez ar stummoù) implijet evel arm standart e rannoù 'zo eus arme Stadoù-Unanet Amerika etre 1957 ha kreiz ar bloavezhioù 1960. Ar fuzuilh emgann standart diwezhañ eo bet er vro-se a-raok donedigezh ar fuzuilhoù-arsailh modern.
| Fuzuilh M14 | |
|---|---|
_(7414626342).jpg) Ur fuzuilh M14 dezhi he c'harger 20 kartouchenn | |
| Kinnig | |
| Bro |  Stadoù-Unanet Amerika
|
| Doare | Fuzuilh-arsailh aotomatek (stumm kentañ) / damaotomatek |
| Mont en-dro | Tennata dre amprest-gazoù, piston |
| Munisionoù | 7,62 × 51 mm |
| Produerien | Springfield Armory Winchester Harrington & Richardson TRW |
| Skouerennoù produet | War-dro 1,3 milion |
| Mare implij | 1957-1964 (evel arm standart arme SUA) |
| Pouez ha muzulioù (stumm orin) | |
| Mas | 3,88 kg |
| Hirder | 1.120 mm |
| Hirder ar c'hanol | 559 mm |
| Perzhioù all | |
| Hed-tenn pleustrek | 457 m |
| Tizh mont e-maez ar boledoù | 853 m/s |
| Endalc'h | Karger-fiñv 20 kartouchenn |
| Lezenn | |
| Rummad e Bro-C'hall | B |
Istor
kemmañEr bloavezhioù 1950 e voe choazet ar 7,62 × 51 mm (pe .308 Winchester evit e stumm sivil) evel kalibr standart armoù-skoaz an AFNA. Rankout a reas ar Stadoù-Unanet sevel un arm-skoaz nevez evit azasaat ouzh ar munisionoù nevez[1]. Pevar arm-skoaz ganet da vare an Eil Brezel-bed a veze implijet betek-neuze, dezhe kalibroù disheñvel : ar fuzuilh damaotomatek M1 Garand (kalibr .30-06 Springfield), ar garabinenn M1 (e .30 Carbine), ar bistolenn-vindrailher M3A1 Grease Gun (e .45 ACP) hag ar fuzuilh-vindrailher BAR (e .30-06 Springfield)[2].
En arsanailh Springfield e voe savet an M14, ur fuzuilh deveret eus an M1 Garand, kambret e 7,62 mm, dezhi ur c'harger 20 tenn (e-lec'h 8 evit ar Garand)[1]. He c'houch hag e flatinenn a oa heñvel ouzh reoù ar Garand[2]. Choazet e voe evel arm standart gant an arme stadunanat e 1957. Pourvezet e voe d'an US Army adalek 1958 ha d'an US Marine Corps goude. Aotomatek e oa stummoù kentañ an M14, met dre ma oa diaes mestroniañ an tennoù aotomatek war un arm skañv kambret e 7,62 mm e voe treuzfurmet kalz skouerennoù evit lakaat o flatinenn da vezañ damaotomatek[1].
Implijet e voe an M14 e brezel Viêt-Nam dreist-holl. Ne reas ket berzh eno : rebechet e veze dezhi bezañ re bonner ha re hir evit an emgannoù en un endro enni kalz struzh. Diaes e oa mestroniañ an tennoù e mod aotomatek, ha breinañ a rae buan he lamm hag he fust koad kraoñ pe koad bezv e koñdisionoù gleb ha tomm ar janglenn. Hervez un diell produet gant an USACGSC e voe chomet a-sav gant produiñ an M14 e 1963 goude ma vije bet embannet gant kontrollerien an US Army e miz Gwengolo 1962 e oa «izeloc'h» evit M1 Garand an Eil Brezel-bed hag an AR-15 nevez-savet. 500 milion a zollaroù a oa bet gouestlet da brogram sevel ha produiñ an M14[3]. Hemañ a voe dibabet evel arm-skoaz standart nevez an US Army adalek 1964 dindan an anv M16. Miret e voe an M14 en he stumm fuzuilh-resisted, dezhi ul lunedenn, dindan an anv M21[2]. Implijet e vez c'hoazh an M14 evel arm-lid gant gwarded an 3e rejimant troadeien (The Old Guard) e bered vroadel Arlington (Virginia)[4].
Ur stumm sivil anvet Springfield Armory M-1A a voe deveret anezhi. E-touez adstummoù an M-1A e kaver an National Match savet evit ar sportoù tennañ, hag unan Scout[2].
Daveennoù
kemmañ- ↑ 1,0 1,1 ha1,2 (fr) Mc NAB Chris, Armes à feu Encyclopédie visuelle, L'Imprévu, 2022, p.147
- ↑ 2,0 2,1 2,2 ha2,3 (fr) LONASSAC, Le Springfield Armory M1-A, e Cibles n°649, miz Gouere 2024, pp. 48-53
- ↑ (en) KAY Bruce I., An Analysis of the Infantry's Need for an Assault Submachine Gun, diell an USACGSC, 10/06/1977, pellgarget d'an 08/08/2024)
- ↑ (en) Weapons war bajenn ar Society of the Honor Guard (lennet d'an 08/08/2024)
