Digeriñ al lañser pennañ

BuhezAozañ

Ganet eo en un tiegezh brezhonegerion divroet en hanternoz Bro-C'hall e-pad ur pennad abalamour ma oa bet e dad el lu gall, ha gellout a rejont distreiñ d'o bro c'henidik, Lannuon e Bro-Dreger, goude ar Brezel-bed kentañ. Deskiñ a reas komz brezhoneg gant e dud, met ivez gant kouerien an atant e-lec'h ma veze kaset da vakañsiñ bep hañv e-kichen Plougonven. Chom a reas skoachet e Lannuon e-pad an Eil Brezel-Bed evit chom hep bezañ kaset da Alamagn, met heuliañ a reas kentelioù saoznek dre lizher gant Skol-Veur Añje ha Skol-Veur Roazhon. Mont a reas da gelenner e Skol Blistin ivez. Echu ar brezel e studias e Roazhon hag eno e kejas gant brogarourien. Gant Pol ar Gouriereg e savas ken abred ha miz C'hwevrer 1945 ar gelaouenn vrezhonek Tír na nÓg hag houmañ a reas berzh buan a-walc'h. Ronan Huon a rae war-dro al lodenn vrezhonek.

Dimeziñ a reas gant Elen ar Meliner, eus Langedig. Pevar mab o deus bet asambles : Gwenael, Tudual, Riwal ha Herve.

E 1947 e voe anvet da gelenner war ar saozneg e Gwengamp ha dre ma yae da seniñ ar vombard e kelc'h keltiek ar gêr en em gavas gant Claudine Mazeas, Polig Montjarret, Dorig Le Voyer ha Jef Le Penven. Goude ur bloavezh en ur skol en Abertawe (Bro-Gembre) ez eas da gelenner e Landerne, Kemper ha Brest. Eno e kelennas e lise an Harteloire ha da c'houde e lise Kerichen betek ma yeas war e leve.

Kamp Etrekeltiek Ar VrezhonegerionAozañ

Ronan Huon a voe e-touez ar re a savas Kamp Etrekeltiek Ar Vrezhonegerion pe KEAV. En deiz a hiziv, pa reer ur sell war a-dreñv hag e weler na pet ha pet all a zo tremenet dre ar c'hampoù hañv-se, en em renter kont pegen pouezus e voe evit dazont ar brezhoneg. Dre ar c'hampoù-mañ, goude an diskar e fin ar brezel, e chomas bev ar spi en hon yezh.

An embannerAozañ

Evel embanner en ur yezh vinorelaet ez eo bet eus ar re bouezusañ al labour a reas Ronan Huon evit broudañ an danvez-skrivagnerien vrezhonek ha pa veze digalonekaet gant diouer ar varnerien ken izel eo al lennerien hag bihan-dister ar re anezho prest da ezteurel o flijadur pe o displijadur. Ur seurt bazhvalan eo bet Ronan Huon hervez Malo Bouessel du Bourg pa alie an oberourien ha pa reizhe o skridoù diouzh ret gant o asant evit ar fazioù yezh. Hervez kont e oa dezhañ ul labour divankañ diehan ha ne veze tu d'e glokaat ken drailhet e oa yezh skrivagnerien 'zo e-keñver an doare-srivañ, an ereadur hag ar steuñv d'an aliesañ. Soñjal a ra da Filip Oillo (arroudennet gant M. Bouessel du Bourg) en deus aberzhet Ronan Huon al levrioù en dije gallet skrivañ.

Klask a rae Ronan Huon skridoù savet en ur yezh yac'h, met ar reizhañ ma c'helle kinnig ken ne fellas ket dezhañ adembann levrioù hag a chome traoù da c'hwennat enno c'hoazh.

 
Bodadeg gant burev Al Liamm : Loeiz Bihannig, Yann-Bêr d'Haese, Andrev Latimier, Ronan Huon

E-pad pell e chomas al labour embann ha skignañ un obererezh kaset da benn gant tud ha ne oant ket tud a vicher gopret evit se, betek ma krogas Yann Goasdoue, ha diwezhatoc'h Coop Breizh, d'ober war-dro ar werzh hag ar skignañ er stalioù. E kav an ti e veze renket an holl levrioù ha niverennoù ar gelaouenn Al Liamm. E pakadoù-post e vezent lakaet gant e wreg pa veze tu d'o urzhiañ war-eeun hep tremen dre un ti-skignañ, kaset e vezent d'ar post ha skignet er bed a-bezh. Ne oant ket o-unan ha tud evel Janed Queillé da skouer, o deus roet harp dezho.

Ar gelaouenn lennegel Al Liamm-Tír na nÓgAozañ

E 1949 en em deuziñ a reas teir c'helaouenn : Al Liamm, Tír na nÓg ha Kened evit dont da vezañ Al Liamm-Tir-Na-nOg. E 1957 e prenas ar gevredigezh Al Liamm, digant Florentin Goinard, an darn vuiañ eus al levrioù brezhonek embannet gant Skridoù Breizh, an ti-embann stag ouzh Strollad Broadel Breizh. Pa ne oa ket mui al Liger-Atlantel e Breizh hervezo, ne glaskas ket lezioù-barn ar Puradur sevel ur prosez a-enep an ti-embann a oa e vurevioù er Baol.

Embannadurioù Al LiammAozañ

An oberourAozañ

OberennoùAozañ

Dalc'het gant melestradur ar gelaouenn Al Liamm hag an embannadurioù stag ne voe ket Ronan Huon evit sevel un oberenn lennegel fonnus. Houmañ a gaver dreist-holl en :

  • Un dastumad barzhonegoù Evidon va-unan (1955) awenet gant gwazhwelouriezh deroù ar goudevezh-brezel,
  • Daou zastumad kontadennoù : An irin glas (1966) hag "Ur Vouezh er Vorenn" (1981), hep mennad politikel ebet hogen dezho dreist-holl ur mennad kenedelour, kaer da lenn,
  • Ur strollad danevelloù, Embannadurioù Al Liamm, 2007. Kavet e vo strollet el levr-mañ holl zanevelloù Ronan Huon bet embannet e-barzh An irin glas, Ur vouezh er vorenn hag e meur a niverenn Al Liamm. Prientet eo bet ar strobad skridoù gant Herve Bihan, Alan Botrel, Tudual ha Riwal Huon. Rakskrid gant Herve Bihan.
  • Labour geriaduriñ : Dictionnaire breton-français français-breton, diwar danvez Roparz Hemon hag e hini (1997).

EnorioùAozañ

E 1992 e voe roet Kolier an Erminig dezhañ en abeg d'e labour evit ar brezhoneg.

LevrlennadurezhAozañ

Liammoù diavaezAozañ